2002. urtean Eusko Legebiltzarrak Sestaoko udalerrian hiri-berrikuntzaren arloan jardun beharrari buruzko ez legezko proposamena onartu zuenez geroztik, ezinbesteko ikusi dugu esku-hartze publikoari laguntzea berrikuntzarako hirigintza-sozietate baten bitartez.

Hala, 2005eko apirilean sinatutako lankidetza-akordioaren testuinguruan, Udalak eta Eusko Jaurlaritzak Sestao Berri sortu genuen, Plan Zuzentzailean bilduta egonik lehentasunezkotzat jo genituen honako jarduera hauek aurrera eramateko: Txabarriko eremuan etxebizitza eta eraikinen berrikuntza eta birgaitzea kudeatzeko hirigintza-sozietate baten antzera jardutea, berrikuntza-jardueretatik eratorritako birkokatzeak gauzatzerakoan irizpide uniformeak erabiltzea, alokairu-etxebizitzak kudeatzea eta herritarrei informazio egokia eskaintzea.

Jardun horiek bultzatzeko, Eusko Jaurlaritzaren Etxebizitza eta Gizarte Gaietako Sailak Sestao Berriren kapital sozialaren % 50 bereganatu du, eta sozietateari diru-laguntzak ematen dizkio, urtetik urtera.

Sestao Berri sozietate publikoa da, udalerriko herritarrena eta herritarrentzat. Ezbairik gabe, ezinbesteko tresna da, Udalak eta Jaurlaritzak Sestaoko hirigintza berritu eta garatzeko aurreikusitako ekintza guztiak arrakastaz bideratu ahal izateko behar-beharrezkoa. Herritarrengana eta benetako premietara hurbiltzetik abiatuta.

Sestao Euskadiko garapen ekonomikoaren abangoardian egon da urte askoan, baina beste edozein udalerrik baino gehiago nabari ditu industrializazioaren gainbeheraren ondorioak: infraetxeak, ingurumen-narriadura, langabezia eta abar. Instituzioak zorretan gaude Sestaorekin, eta horregatik beharrezko ikusten dugu Sestaon inbertsio publikoa bultzatzea eta esku-hartze jakin batzuk garatzea.

Hortaz, Sestao Berriren ekintza Eusko Jaurlaritzak eta Udalak udalerriaren garapen soziourbanistikoaren alde egindako apustu estrategiko globalaren barnean kokatu behar da. Apustu horri jarraiki, halaber, 1.000 etxebizitza babestu berri eraikiko dira Puntan, 100 Labariegan eta 25 Maisu-maistren Etxean. Hori ez ezik, hiria birgaitzearen eta berritzearen alde ere egin nahi izan dugu: La Anunciación auzoan, orain artean, eta Txabarrin, une honetan. Etxebizitza berriak sustatzeko lana, azken batean, dagoeneko eraikita dagoen hiria berreskuratzearekin batera. Etxebizitza duinak sustatu behar ditugulako, hiri-ingurune duin batean.

Sestao Berri 2010eko presidentea